Најмалку три лица загинаа, а 29 се повредени, меѓу кои и шест деца, во руски напад со беспилотни летала врз украинската престолнина Киев, соопштија украинските власти.
Градоначалникот на Киев, Виталиј Кличко, изјави дека нападот се случил во округот Десњански и дека главниот град бил цел на руски дронски напади по вторпат во последните 24 часа.
„Според првичните информации, три лица се убиени, а 27 се повредени, меѓу нив и шест деца“, напиша Кличко на Телеграм.
Нападот предизвикал сериозни оштетувања и пожари. Едно беспилотно летало удрило во деветкатна станбена зграда, каде што спасувачите успеале да извлечат 13 лица од горните катови. Друго летало погодило 16-катна зграда, при што се скршиле прозорци од првиот до деветтиот кат.
Украинските служби за вонредни ситуации информираа дека дрон удрил и во зграда во областа Оболонски, предизвикувајќи дополнителна материјална штета.
Ова е најновиот во серијата руски напади со беспилотни летала кои во последните недели ја погодија украинската престолнина.
