Бразилскиот претседател Луиз Инасио Лула да Силва остро ја осуди американската воена операција во Венецуела и апсењето на претседателот Николас Мадуро, јавува германската агенција ДПА.
Во објава на социјалната мрежа X, Лула оцени дека бомбардирањето на венецуелска територија и приведувањето на шефот на државата претставуваат сериозно кршење на меѓународното право и директна навреда за суверенитетот на Венецуела.
„Овие дејствија ја преминуваат границата на прифатливото и создаваат исклучително опасен преседан за меѓународната заедница“, напиша бразилскиот претседател, предупредувајќи дека вакви интервенции водат кон насилство, хаос и долгорочна нестабилност.
Лула истакна дека нападите врз суверени држави со игнорирање на меѓународните норми ја поткопуваат глобалната безбедност и можат да имаат сериозни последици пошироко од регионот.
Бразил, како најголема економија во Латинска Америка, има долга заедничка граница со Венецуела, а Лула и претходно јавно ја изразуваше својата загриженост за регионалната стабилност поради заострените односи меѓу Соединетите Американски Држави и Венецуела.
