2026 година се најавува како клучна за модернизацијата на одбранбениот систем на Грција. Според плановите на Министерството за национална одбрана и Генералштабот, токму оваа година ќе започнат процедурите за изградба на сеопфатна одбранбена „купола“ што ќе ги штити островите и копното од ракетни напади, залутана муниција и други современи закани, објави грчкиот весник „Катимерини“.
Најголемиот дел од новиот систем, наречен „Ахилов штит“, ќе биде под оперативна надлежност на Копнените сили, кои ќе управуваат со поголемиот број од новите платформи. Паралелно, Воздухопловните сили и Морнарицата веќе се зајакнуваат со модерни авиони и поморски платформи, со што се создава основа за повеќеслојна национална одбрана.
До средината на 2026 година се очекува потпишување на договорите за првата компонента од „Ахиловиот штит“ – набавка на 36 повеќекратни ракетни системи PULS. Овие системи ќе ја зајакнат ракетната артилерија на Копнените сили и ќе бидат испорачани со комплетен пакет муниција, вклучувајќи ракети „Предатор Хок ЕР“. Со тоа, за прв пат, грчките копнени сили ќе добијат способност за дејствување на цели на растојание поголемо од 300 километри.
Клучните елементи на одбранбената „купола“ – противвоздушните и противракетните системи – се планира да станат оперативни по крајот на деценијата. Сепак, одлуките за нивните технички карактеристики, динамиката на испорака и учеството на домашната одбранбена индустрија ќе бидат донесени уште во текот на 2026 година. Процесот од активирање на програмата до финалното потпишување на договорите вклучува најмалку 28 различни административни и институционални фази.
Според досегашните анализи на Генералштабовите, изборот на системите е направен врз основа на искуствата од современите воени конфликти, а почетната активација на ниво на SAGE веќе е завршена. Во првите месеци од 2026 година, политичкото раководство ќе ги презентира препораките пред парламентарната комисија за вооружување и пред Советот за национална безбедност (KYSEA).
Главниот столб на „Ахиловиот штит“ ќе го сочинуваат израелските системи „Spyder“, „Barak MX“ и „David’s Sling“, наменети за одбрана од закани со краток, среден и долг дострел. Испораката ќе се реализира преку меѓувладин договор со израелската агенција SIBAT, по што ќе следуваат долги преговори и дополнителни парламентарни одобренија.
Вкупната вредност на аквизицијата се проценува на над 3 милијарди евра. Атина инсистира најмалку 25% од проектот да биде реализиран со учество на грчката одбранбена индустрија, услов што израелската страна, според најавите, е подготвена да го прифати. Целта, како што изјави министерот за национална одбрана Никос Дендиас, е системот да обезбеди заштита не само од воздушни, туку и од поморски, подводни и кибер закани.
Во креирањето на оваа одбранбена мрежа, грчките воени структури ги анализираат искуствата од војната во Украина, конфликтите на Блискиот Исток и Нагорно-Карабах, со посебен акцент на развојот на беспилотните и системите за електронско војување. Во првата фаза, „куполната“ одбрана ќе се потпира на веќе инсталирани системи за надзор во Еврос и на островите во Источен Егеј, додека паралелно се разгледуваат решенија за напредни мрежи за рано предупредување на море, копно и во воздух.
