Силниот ветер што утрово ја зафати Софија предизвика тешка сообраќајна несреќа со смртни последици на патот кон планината Витоша. Огромно дрво паднало врз автомобил во движење на Беловодскиот пат, при што загина 31-годишна жена.
Несреќата се случила околу 9:45 часот. Во возилото се наоѓало четиричлено семејство кое тргнало на излет. Жената, која седела на совозачкото место, починала на лице место откако дрвото го смачкало автомобилот.
Автомобилот го управувал нејзиниот сопруг, 34-годишен маж, кој не се здобил со телесни повреди, но бил во состојба на тежок шок. Двете деца кои се наоѓале на задното седиште, за среќа, поминале без повреди.
Патниот правец кон локалитетот „Копитото“ по инцидентот е затворен за сообраќај, освен за возилата на јавниот превоз.
Трагедијата отвори прашања за одговорноста за одржување на теренот. Иако местото се наоѓа во рамки на Природниот парк Витоша, директорката Севдалина Димитрова изјави дека дрвото било на парцела заведена како приватен имот во урбанизирана зона. Според неа, стеблото било скапано одвнатре, без надворешни знаци што би укажале на опасност, а последната контрола на теренот била извршена на 20 октомври, кога биле отстранети сите видливо ризични дрвја.
Градоначалникот на Софија упати сочувство до семејството и нареди итни проверки на сите критични подрачја во градот. Само денеска се евидентирани десетици пријави за паднати дрвја, оштетени огради и материјална штета предизвикана од силниот ветер.
Надлежните служби апелираат до граѓаните да избегнуваат движење низ шумски и планински подрачја за време на невреме и навремено да пријавуваат потенцијално опасни дрвја.
