(ВИДЕО) Венецуелски иселеници го прославија падот на Мадуро во Буенос Аирес

Илјадници венецуелски иселеници синоќа се собраа во центарот на Буенос Ајрес за да го одбележат падот на поранешниот венецуелски лидер Николас Мадуро, јавуваат профили и медиуми на социјалните мрежи.
На видеата што кружат онлајн се гледаат масовни собири, веење венецуелски знамиња, извици на радост и огномети, додека насобраните ја слават веста која, според нив, означува надеж за промени и демократска иднина за Венецуела. Дел од присутните порачаа дека прославата е израз на олеснување по години економска и политичка криза што ги принудија да ја напуштат татковината.

Аргентина, која во изминатата деценија прими стотици илјади Венецуелци, е една од земјите со најголема венецуелска дијаспора во регионот. Токму затоа, Буенос Ајрес стана симболично место за јавно и масовно изразување на емоциите по најновите настани во Венецуела.

Иако официјалните реакции од венецуелските институции и дел од меѓународната заедница сè уште пристигнуваат, сцените од аргентинската престолнина покажуваат дека дел од венецуелската дијаспора веќе ја доживува случката како историски пресврт.