Хуман гест за Бадник: Млад велешанец подели 900 оброци на социјално загрозени граѓани

Во духот на Бадник и празничната солидарност, младиот велешанец Лучијано Чорев и годинава покажа дека хуманоста и човечноста немаат граници. Со јасна цел никој да не остане гладен за празникот, тој организираше акција за поделба на 900 топли оброци на социјално загрозени сограѓани.

Акцијата беше насочена кон лица на кои помошта им е најпотребна, а поделбата на храната помина во атмосфера на почит, достоинство и искрена човечка поддршка. Чорев истакна дека ова не е само симболичен празничен чин, туку искрена намера да се помогне таму каде што потребата е најголема, особено во денови кога семејството, заедништвото и солидарноста се во фокусот.

„Поделивме 900 оброци и навистина ми е драго што успеавме да допреме до луѓето на кои им значи секоја подадена рака. Се надевам дека и следната година ќе имаме можност повторно да ја реализираме оваа хумана мисија“, изјави Чорев.

Хуманата иницијатива брзо привлече внимание и на пошироката јавност, откако видеото од акцијата беше споделено на социјалните мрежи од страна на Божана Кулавкова од Радио „Голди“. Следуваа бројни позитивни реакции, пораки со благодарност и восхит за несебичниот потег на младиот велешанец, кои пристигнаа од граѓани од целата земја.