Ирскиот актер Мајкл Патрик, познат по улогата во серијата Игра на тронови, почина на 35-годишна возраст по долга борба со моторна невронска болест.
Тажната вест ја потврди неговата сопруга, Наоми Шиан, која сподели дека актерот починал мирно, опкружен со најблиските, откако пред десетина дена бил сместен во хоспис.
„Синоќа, Мик нè напушти. Почина мирно, со семејството и пријателите покрај него“, напиша таа, додавајќи дека тој бил инспирација за сите кои го познавале.
На Патрик му била дијагностицирана болеста во февруари 2023 година. Станува збор за прогресивно невролошко нарушување кое постепено ги уништува нервните клетки задолжени за движење, говор и дишење. Неговата лична трагедија била уште поголема бидејќи и неговиот татко починал од истата болест.
И покрај тешката дијагноза, актерот продолжил активно да работи. Во една од последните објави, тој открил дека одлучил да не се подложи на трахеостомија – процедура која би му го продолжила животот.
Иако пошироката публика го препозна по неговото појавување во „Игра на тронови“, Патрик остави силен белег во театарот. Дипломирал на Универзитет Кембриџ и настапувал со Royal Shakespeare Company.
Во 2024 година, тој влезе во историјата како првиот актер со попреченост во Ирска кој ја толкувал главната улога во претставата „Ричард III“ во театар во Белфаст, изведувајќи ја улогата од инвалидска количка. Претставата му донесе и значајни признанија, потврдувајќи ја неговата посветеност и талент до самиот крај.
