Премиерот Христијан Мицкоски изјави дека тврдењето на бугарското Министерство за надворешни работи, според кое „наместо македонски јазик постои достапен јазик“, само ги потврдува ставовите на македонската Влада дека барањата од Софија не се ограничени единствено на внесувањето на Бугарите во македонскиот Устав.
Тој истакна дека ваквите позиции од бугарска страна не го изненадуваат и дека уште од самиот почеток било јасно оти станува збор за пошироки условувања поврзани со идентитетските прашања.
„Ова не треба да го чуди никого. Се потврдуваат тезите дека не е само Бугарите во Устав, туку обид за целосно редефинирање на македонскиот идентитет“, изјави Мицкоски по денешната Божиќна литургија во Соборниот храм во Скопје.
Премиерот нагласи дека, и покрај актуелните политички разлики, ова се денови кога е потребно обединување и заеднички настап за прашања од национален интерес. Тој упати повик до опозицијата да застане во одбрана на македонскиот идентитет и националните позиции.
Воедно, Мицкоски изрази жалење што претходната влада, како што рече, прифатила ултиматум од источниот сосед, што довело до застој во евроинтеграцискиот процес, но додаде дека сè уште постои можност за заеднички и усогласен пристап во одбрана на државните интереси.
