Скопскиот пазар на недвижности стартуваше годинава со забележителен раст на цените на становите, но темпото на поскапување благо се забави. Во првиот квартал, индексот на Народната банка покажува дека становите поскапеле за 16,7% на годишно ниво, додека квартално зголемувањето изнесува само 0,1%. За споредба, минатата година цените бележеа постојан раст, со 19,5% во првиот квартал, 19,9% во вториот, а потоа скок до 25% во третиот и четвртиот квартал.
Според последниот извештај на Агенцијата за катастар на недвижности, за 2026 година се очекува пазарот да остане стабилен со умерен раст, зголемен интерес за инвестиции и продолжување на растот на закупите.
Становите и понатаму доминираат на пазарот: минатата година тие сочинуваа 33% од сите купопродажби и 48% од вкупната пазарна вредност. И покрај намалувањето на бројот на продадени станови за 3,9%, нивната вкупна вредност пораснала за 10,8%, што укажува на поскапување и повисок квалитет на понудата.
Најголем интерес се бележи во општините Центар, Аеродром и Карпош, кои истовремено се и најскапи, со просечни цени од 1.692, 1.558 и 1.419 евра за квадратен метар. Најскапите недвижности минатата година го променија сопственикот: луксузен стан во Аеродром се продаде за 166.500 евра, куќа во Центар за 1,5 милион евра, додека највредниот деловен простор достигна цена од 6,8 милиони евра, исто така во Центар.
