Црна Река се излеа од своето корито и предизвика сериозни поплави во атарите на селата Бараково и Граиште, во Демирхисарско. Водостојот и понатаму е во пораст, а водата се приближи непосредно до куќите, што предизвикува голема загриженост кај локалното население.
Поради излевањето, патниот правец Бараково – Вардино е зафатен од вода и моментално е непрооден за сообраќај. Целото поле во Бараково и Граиште е под вода, а значителни земјоделски површини се поплавени.
Жителите и земјоделците стравуваат од големи материјални штети, откако на нивите каде што вложиле труд, надеж и финансиски средства, денес има само вода. Се очекува надлежните служби да ја следат состојбата и да преземат мерки за заштита на населението и имотите.
