Декември 2025 година помина без ценовни изненадувања во угостителството на месечно ниво, но годишната споредба покажува јасен раст. Според најновите податоци на Државниот завод за статистика, цените на угостителските услуги останале непроменети во однос на ноември, додека во споредба со декември 2024 година се повисоки за 3,5 проценти.
Најголем удар врз џебот на потрошувачите доаѓа од храната и пијалоците. Во изминатите 12 месеци цените на храната во угостителските објекти се зголемиле за 7,8 проценти, а алкохолните пијалоци поскапеле уште повеќе – за 8,7 проценти. Од друга страна, ноќевањата бележат спротивен тренд, со пад на цените од 12,1 процент на годишно ниво.
Пошироката слика за целата 2025 година покажува континуиран раст на трошоците во угостителството. Во периодот од јануари до декември, цените на угостителските услуги се зголемиле за 4,8 проценти во споредба со истиот период претходната година. Во однос на декември 2024 година, кумулативниот раст изнесува 2,3 проценти, што потврдува дека притисокот врз цените во овој сектор и натаму е присутен.
