Гувернерот на Народната банка, Трајко Славески, изјави дека нивото на домашните цени во декември 2025 година останало непроменето, и покрај тоа што месечната инфлација во однос на ноември изнесува 0,4 отсто.
Според него, овој раст се должи исклучиво на категоријата „транспорт“, каде што е забележано зголемување на цените од дури 5,8 проценти. Славески посочи дека податокот е невообичаен, имајќи предвид дека цените на горивата биле стабилни, а цените во јавниот превоз непроменети.
Како главна причина за растот во транспортот, гувернерот го издвои авионскиот превоз, чии цени во декември пораснале за дури 42 проценти. Тој нагласи дека станува збор за компонента која е во голема мера поврзана со странски фактори и не ја одразува состојбата на домашниот пазар.
„Доколку од пресметката на индексот на цени се изостави транспортот, односно авионскиот превоз, месечната инфлација во декември 2025 година би изнесувала точно 0,0 проценти“, изјави Славески.
Тој оцени дека ова е позитивен сигнал и оти постојат добри изгледи годината да заврши со стапка на инфлација под три проценти.
