Во Иран продолжува серијата протести предизвикани од економската криза, која веќе трае 12 денови. Во четвртокот навечер целата земја остана без интернет, додека сцените од протестите се сè повеќе насилни.
На снимките од различни делови на земјата се гледа како безбедносните сили пукаат и користат солзавец против демонстрантите, кои одговараат со фрлање камења и други предмети. Според извори, загинале најмалку 45 лица, меѓу кои осум деца, а уапсени се над 2.200 демонстранти. Стотици се повредени.
Протестите започнаа на 28 декември во Техеран, кога трговците излегоа на улиците поради падот на вредноста на иранскиот ријал и високата инфлација, која достигна 40%. Цените на храната се зголемија за повеќе од 70%, а лековите за околу 50%.
Демонстрантите се жалат на лошата економска состојба, корупцијата и несигурноста за иднината, а многумина скандираат против врховниот лидер Али Хамнеи и покажуваат симпатии кон прогонетиот принц Реза Пахлави.
Иранските власти најавија дека мирните демонстранти нема да бидат нападнати, но изредниците со оружје и насилници ќе се соочат со брзи казни. Владата исто така најави помош од 7 долари месечно за секој од 71 милион граѓани за да се ублажат трошоците за живот.
Експертите предупредуваат дека растечката фрустрација и економската неизвесност може да доведат до уште понасилни протести, што, пак, ќе предизвика поостар одговор од властите.
Видеото може да го погледнете тука
