Турскиот претседател Реџеп Таип Ердоган изјави дека Турција сериозно ја разгледува можноста за воена операција против Израел, вклучително и испраќање на војници, објави The Jerusalem Post.
– Исто како што влеговме во Карабах и Либија, така ќе постапиме и сега – порача Ердоган, нагласувајќи дека Анкара може да интервенира за да го спречи, како што рече, протерувањето на Палестинците од нивните територии.
Тој истакна дека, и покрај прекинот на огнот, Израел наводно придонел за раселување на повеќе од еден милион жители во Либан, поради напади врз цивилни подрачја, додавајќи дека Турција мора да покаже сила за да спречи сличен развој на настаните во Палестина.
Изјавите предизвикаа жестока реакција во Израел. Министерот за наследство Амихај Елијаху го нарече Ердоган „диктатор со империјални амбиции“ и најави иницијатива за прекин на дипломатските односи меѓу двете земји.
Во меѓувреме, тензиите дополнително се продлабочуваат, откако турското Министерство за надворешни работи упати критики кон израелскиот премиер Бенјамин Нетанјаху, особено за неговите ставови околу разговорите меѓу САД и Иран.
