Документарниот филм „Приказната за Силјан“, во режија на Тамара Котевска, ја освои престижната награда Audience Choice Prize на Cinema Eye Honors, една од највлијателните меѓународни награди за документарен филм.
Наградата, која се доделува исклучиво врз основа на гласовите на публиката, доаѓа по жестока конкуренција со филмови од Бразил, Канада, Палестина, Гана, САД, Данска и Нов Зеланд, потврдувајќи дека македонската приказна може да одекне на светската сцена.
Audience Choice Prize се смета за едно од најзначајните признанија во современиот документарен филм, бидејќи ја одразува директната поврзаност на публиката со приказната. „Ова е можеби најважната награда што ја освои „Силјан“, затоа што доаѓа од публиката. Таа не е само признание за филмот, туку и за луѓето кои гласаа за него“, изјави режисерката и продуцентка Тамара Котевска.
Филмот, откупен од National Geographic Documentary Films и прикажан на низа престижни меѓународни фестивали, повторно докажа дека локалните, автентични приказни зборуваат универзален јазик и ги обединуваат гледачите ширум светот.
Со ова признание, „Приказната за Силјан“ го заокружува својот исклучителен меѓународен пат и ја потврдува позицијата на Македонија како земја од која произлегуваат приказни со силен, препознатлив и човечки глас на светската документарна сцена.
