Либерално-демократската партија (ЛДП) ја истакнува потребата лидерските средби да се фокусираат на суштински реформи, наместо на дебати за укинување или задржување на техничката влада. Според партијата, само такви состаноци можат да донесат конкретни решенија за подобрување на животот на граѓаните.
„Ние сме подготвени да учествуваме на лидерска средба, но не ако темата е само техничката влада, без одговори на клучните прашања кои го засегаат секојдневието на граѓаните. Дали ќе се намали цената на животот? Дали ќе добиеме почист воздух, повеќе средства од ЕУ или ќе се реши корупцијата? Ако не, тогаш темата е празна“, порачуваат од ЛДП.
Партијата го критикува и бавното спроведување на реформската агенда, истакнувајќи дека граѓаните се уморни од делумни изјави и ад-хок решенија кои не водат кон системски промени.
Моника Зајкова и нејзиниот тим предлагаат значително намалување на бројот на функционери: Македонија, според нив, не ѝ требаат 120 пратеници, туку 90, ниту 25 министерства, туку 15. Исто така, ЛДП бара намалување на бројот на членови на управни и надзорни одбори и заменици директори, со цел повеќе средства да останат во џебот на граѓаните.
„На Македонија не ѝ е потребна техничка влада, туку ефикасен, рационален и деполитизиран систем со една изборна единица, отворени листи и можност граѓаните сами да избираат кој ќе ги претставува“, се наведува во партиското соопштение.
ЛДП потенцира дека разговорите имаат смисла само ако се водат за вистински и суштински реформи, а сè друго би било губење време на сметка на граѓаните.
