Американскиот претседател Доналд Трамп изјави дека Иран предложил преговори по неговата закана за можен напад, поради репресијата врз демонстрантите и смртта на стотици лица. Трамп појасни дека неговата администрација работи на закажување средба со Техеран, но потенцираше дека можеби ќе мора да дејствува пред состанокот поради зголемениот број на жртви и продолжените апсења на демонстранти.
„Состанокот се договара, но можеби ќе мораме да дејствуваме пред него поради она што се случува. Иран повика и сака да преговара,“ рече Трамп пред новинарите.
Иран засега не издал официјално соопштение поврзано со изјавата на Трамп, но претходно предупреди дека американската армија и Израел ќе бидат „легитимни цели“ доколку САД употребат сила за заштита на демонстрантите.
Според американската активистичка организација Human Rights Activists News Agency, најмалку 544 лица загинале во двонеделните протести – 496 демонстранти и 48 припадници на безбедносните сили, додека околу 10.600 лица биле притворени. Поради прекинот на интернет и телефонските линии, следењето на протестите од странство е отежнато.
Трамп веќе ја изрази својата поддршка за демонстрантите. New York Times и Wall Street Journal известија дека американски официјални лица му претставиле воени опции за можен напад врз Иран, но претседателот сè уште не донел конечна одлука.
Протести против иранската влада се одржаа и во Вествуд, Лос Анџелес, каде што живее најголемата иранска заедница надвор од Иран. Полицијата интервенираше откако камион удрил во демонстранти; едно лице е повредено, возачот е уапсен.
Австралија денеска ги повика своите државјани веднаш да го напуштат Иран поради можност за затворање на воздушниот простор. Министерството за надворешни работи предупреди дека безбедносната ситуација е „исклучително нестабилна“, работата на австралиската амбасада е прекината, а обезбедувањето конзуларна помош е екстремно ограничено. Патниците се советуваат да избегнуваат јавни собири и да бидат подготвени за подолг престој во засолниште со доволно вода, храна и лекови.
