Линеарното зголемување на пензиите останува – Уставен суд ја сопре постапката
Уставниот суд денеска соопшти дека отпаднал сомнежот за неуставност на член 2 од измените на Законот за пензиско и инвалидско осигурување од 2025 година, со што линеарното зголемување на пензиите останува во сила.
Од Судот информираат дека предлогот за оценување на уставноста не добил мнозинство гласови на денешната седница, па така оспорениот законски член продолжува да важи во правниот поредок. „Отпадна сомнежот за неуставност на оспорениот закон и Судот денеска ја сопре постапката“, велат од Уставен суд.
Постапката за оценување на уставноста беше поведена поради сомнеж дека линеарното зголемување може да ја наруши уставната еднаквост, правото на сопственост и начелото на социјална сигурност, бидејќи еднакво ги третира пензионерите со различни придонеси и создава непропорционални ефекти.
Уставниот суд потенцира дека по претходниот сомнеж од 19 ноември минатата година, кога мнозинство од судиите изразиле сомнеж за уставноста, се очекуваше конечна одлука по добивање мислења од предлагачите и доносителот на законот. Со денешната одлука, линеарното зголемување на пензиите останува непроменето, спротивно на изјавите на премиерот Христијан Мицкоски дека Судот веќе го укинал овој член.
