Републикански пратеник во американскиот Конгрес ја отвори една од најконтроверзните геополитички теми во последно време – иднината на Гренланд. Конгресменот Ренди Фајн официјално поднесе законска иницијатива со која се предлага островот да биде анектиран и да добие статус на нова сојузна држава на Соединетите Американски Држави.
Со предлог-законот, американскиот претседател Доналд Трамп би бил обврзан да изготви детален извештај за законските и уставните промени неопходни за вклучување на Гренланд во американскиот федерален систем. Документот треба да ги дефинира чекорите, процедурите и правните импликации од евентуалниот прием на островот како 51-ва држава.
Фајн ја брани иницијативата со предупредување за засиленото присуство на Кина и Русија во арктичкиот регион, кое, според него, претставува директен предизвик за американските безбедносни и стратешки интереси. Арктикот, вели тој, станува ново поле на глобално натпреварување, а САД не смеат да останат пасивни набљудувачи.
Според конгресменот, доколку Вашингтон сака да ја зачува и обнови својата глобална моќ, неопходни се храбри и решителни потези – дури и кога тие звучат радикално. Идејата за Гренланд како американска држава, иако засега останува на ниво на иницијатива, веќе предизвикува силни реакции и отвора прашања за идниот баланс на силите на далечниот север.
