ДУИ вечерва потврди дека Али Ахмети утре ќе присуствува на лидерската средба што ја свика претседателот на ВМРО-ДПМНЕ, Мицкоски. Засега не се знае каков став ќе има Ахмети за прашањето за техничката влада. Пратеничката Фадила Зендели изјави дека конечната одлука за тоа останува до утре, и дека ставот за укинување на техничката влада е ексклузивно право на претседателот на партијата.
Од поканетите, единствен кој ќе остане надвор од средбата е Венко Филипче. Тој изјави дека не сака да седи на иста маса со, како што ги нарече, „криминалци“, и дека најмалку сака да разговара за укинување на пржинската техничка влада.
Од коалициските партнери на Владата, на средбата се очекува да присуствуваат претседателот на ЗНАМ и градоначалник на Куманово, Максим Димитриевски, како и градоначалникот на Тетово, Биљал Касами, од коалицијата „Вреди“.
Левицата, пак, најави дека ќе прифати укинување на техничката влада, но само ако се воведе една изборна единица. Пратеникот Амар Мециновиќ истакна дека Левицата ќе присуствува на лидерската средба со цел да влезе во конструктивен дијалог со парламентарното мнозинство.
Средбата ја поздравија и ЛДП и ДОМ, чии претставници истакнаа дека нивните очекувања се насочени кон промена на темите за дискусија.
