Во голема координирана акција на Царинската управа, заедно со МВР, УЈП, Агенцијата за пошти и Државниот пазарен инспекторат, откриена е фирма која илегално вршела меѓународни поштенски услуги и криумчарела стока.
При претресот на објектот, инспекторите пронашле 166 поштенски пратки со различна стока, чија вредност се проценува на околу 240.000 денари. Сите предмети биле запленети, а против едно правно и едно физичко лице поднесена е кривична пријава за прикривање стоки и царинска измама.
Според Царинската управа, фирмата работела без соодветна лиценца, внесувајќи пратки преку граничен премин без да ги пријави кај царинските органи. Стоката потоа се складирала во приватен магацин, од каде нелегално би се доставувала до нарачателите за паричен надомест.
Управата на царината најави дека ќе продолжи со засилени контроли и координирани акции со цел откривање и спречување на сите форми на криумчарење и незаконско работење, заштита на државните финансии и обезбедување фер пазарна конкуренција.
