Веста дека кај судијата Ѓоко Ристов се најдени 350 илјади евра пари осомничени за корупција, не е само индивидуален скандал, туку е вест која ја уништува дури и последната доверба што граѓаните ја имаа во правосудниот систем – оцени Движењето Вреди на денешната прес-конференцијата одржана од портпаролот Дритон Сулејмани.
– Вреди е убедена дека ова не е изолиран случај, туку врв на ледениот брег на еден скапан систем, кој со години ги штити силните, а ги угнетува обичните граѓани. Она што ја прави ситуацијата уште поалармантна е фактот дека Ѓоко Ристов не е непознато име за правдата. Напротив. Тој, заедно со судијата Енвер Беџети, сега прогласен за персона нон-грата беа и дел од судските одлуки што го отворија патот за слобода за Сашо Мијалков – рече Сулејмани.
Затоа, рече портпаролот Сулејмни, денес поставуваме неколку конкретни прашања:
– Во колку други случаи биле вклучени Ѓоко Ристов и Енвер Беџети?
– Во колку случаи биле дел од одлуки за притвор, финансиски гаранции или одложувања на постапките?
– Кои конкретни одлуки доведоа до ослободителни пресуди и избегнување на одговорност за моќници?
– Главното прашање што останува е кој ги држел овие луѓе на овие позиции толку години и зошто?
– Вреди е свесна дека работата што претстои е огромна. Но, едно е нешто што не може да се преговара: целосни и независни истраги. Конкретна одговорност, со имиња и презимиња. И радикално чистење на систем скапан до срж – рече Дритон Сулејмани на пресконференцијата на Вреди.
