Министерот за дигитална трансформација, Стефан Андоновски, денеска презеде нова акција против нелегалното приредување игри на среќа на интернет. Тој потпиша налог за ограничување на пристапот до дополнителни 33 веб-страници и веб-апликации кои функционираат надвор од законските рамки, со што вкупниот број на забранети нелегални платформи достигна 307.
Документот веднаш е проследен до Агенцијата за електронски комуникации, која во рок од пет дена треба да го обезбеди спроведувањето преку сите оператори на мрежи. Со ова, властите ја засилуваат контролата врз дигиталниот простор и ги штитат граѓаните од потенцијални ризици поврзани со нелегални онлајн игри.
Министерството нагласува дека борбата против нелегалното приредување игри на среќа е континуирана и дека ќе продолжат сите мерки за создавање сигурен и безбеден интернет за јавноста.
