Данска ја крева безбедносната завеса над Гренланд и најавува засилено воено присуство на островот, во услови на растечки геополитички тензии и зголемено внимание кон Арктикот. Во рамки на воената вежба „Арктичка издржливост“, Копенхаген во наредниот период ќе распореди авиони, поморски капацитети и војници, заедно со повеќе европски сојузници.
Германија, Шведска, Франција и Норвешка веќе одговорија на повикот на Данска и потврдија учество со свои воени контингенти. Целта, како што посочуваат официјалните лица, е зајакнување на оперативната подготвеност и координацијата меѓу сојузниците во арктички услови.
Данскиот министер за одбрана, Троелс Лунд Поулсен, истакна дека Арктикот има стратешко значење не само за Данска, туку и за нејзините партнери. Според него, заедничките активности се неопходни за подобрување на способноста за дејствување во регионот и за демонстрација на единство меѓу сојузниците.
„Во наредните недели, заедно со европските и арктичките партнери, ќе анализираме како да обезбедиме поголемо и поефикасно присуство и интензивирани вежбовни активности во Арктикот“, порача Поулсен.
Германија веќе започна со распоредување на својот контингент – 13 воени лица пристигнуваат на Гренланд како дел од заедничка истражувачка мисија со други партнерски земји. Шведска, пак, испраќа офицери од своите вооружени сили, кои ќе учествуваат во планирањето на следните фази од вежбата, што го потврди и шведскиот премиер Улф Кристерсон преку објава на социјалните мрежи.
Франција, исто така, се приклучува на операцијата. Претседателот Емануел Макрон соопшти дека првите француски војници веќе се упатени кон Гренланд, а во следниот период се очекува и дополнително засилување. Норвешка го заокружува списокот на учесници со испраќање двајца свои војници.
Засилената воена активност доаѓа во момент кога повторно се актуелизира интересот на САД за Гренланд, автономна територија под дански суверенитет, што дополнително ја става безбедноста на Арктикот во фокусот на меѓународната јавност.
