Сингапур и годинава ја задржа позицијата на земја со најмоќен пасош во светот, овозможувајќи безвизен пристап до 192 дестинации, покажува најновиот „Henley Passport Index“ за 2026 година. На спротивниот крај од листата повторно се најде Авганистан, чии граѓани можат да патуваат без виза во само 24 земји.
Индексот ги рангира светските пасоши според бројот на дестинации до кои нивните носители имаат пристап без претходно обезбедена виза. Според проценките на Меѓународната асоцијација за воздушен транспорт (IATA), во 2026 година се очекува рекорден број патувања, со повеќе од 5,2 милијарди патници на глобално ниво.
„Иако сè повеќе луѓе имаат економска можност да патуваат, многу националности сфаќаат дека самиот пасош сè уште не е доволен за непречено преминување на границите“, изјави генералниот директор на ИАТА, Вили Волш, нагласувајќи ја важноста на визна политика и меѓудржавни договори.
Најголем напредок во изминатите две децении бележат Обединетите Арапски Емирати, кои од 2006 година наваму додале 149 безвизни дестинации и се искачиле за 57 места, позиционирајќи се на петтото место со пристап до 184 земји. Овој резултат се припишува на активната дипломатија и континуираната визна либерализација.
Значителен напредок бележат и земјите од Западен Балкан и Источна Европа. Албанија се искачи за 36 позиции и сега е на 43-то место, Украина напредуваше за 34 места и се најде на 30-та позиција, а Србија со скок од 30 места е на 34-то место. Северна Македонија бележи напредок од 27 позиции и сега се наоѓа на 38-то место на листата.
Босна и Херцеговина и Грузија со идентичен напредок се рангирани на 42-то место. Во последните 20 години, Боливија е единствената земја што забележала пад, губејќи пет визни олеснувања и паѓајќи за 32 места.
На дното на листата, покрај Авганистан, се наоѓаат Сирија, Ирак, Пакистан и Јемен, чии пасоши овозможуваат безвизен пристап во помалку од 35 земји. Овие податоци уште еднаш ја истакнуваат големата нееднаквост во глобалната мобилност, каде што дипломатските односи и геополитичката стабилност играат клучна улога.
