Американскиот министер за енергетика, Крис Рајт, и премиерот на Словачка, Роберт Фицо, вчера во Вашингтон потпишаа меѓувладин договор за зајакнување на соработката во цивилната употреба на нуклеарната енергија. Целта е намалување на зависноста на Словачка од руските енергетски извори.
Рајт истакна дека договорот ја покажува „заедничката посветеност на зајакнување на европската енергетска безбедност и суверенитет во наредните децении“. Фицо го оцени договорот како „значајна пресвртница“ во билатералните односи и сигнал за стратешко партнерство меѓу двете земји во областа на енергијата.
Договорот предвидува изградба на нова нуклеарна реакторска единица од 1.200 мегавати на локацијата Јасловске Бохунице. Постојните централи во Јасловске Бохунице и Моховце веќе покриваат повеќе од половина од домашната потрошувачка на електрична енергија, но нивниот советски и руски дизајн е застарен, што предизвикува загриженост кај антинуклеарните групи, особено во соседна Австрија. Јасловске Бохунице се наоѓа околу 100 километри источно од Виена.
