Со ниските јануарски температури, греењето повторно станува една од најголемите ставки во домашниот буџет. Анализите покажуваат дека изборот на енергенс може значително да ја зголеми или намали месечната сметка, при што разликите меѓу поединечните системи се драстични.
Кога станува збор за греење на струја, инвертер клима уредите моментално се најисплатлива опција. Тие функционираат како топлински пумпи и за секој потрошен киловат-час електрична енергија произведуваат од три до четири киловат-часа топлина. Благодарение на оваа ефикасност, тие трошат и до трипати помалку струја од класичните електрични греалки или панел радијатори.
Огревното дрво, иако со децении е најраспространет начин за греење, полека станува поскап избор. Цените оваа сезона се движат меѓу 4.500 и 5.500 денари за кубен метар, а кога ќе се вклучат трошоците за транспорт, сечење и складирање, вкупната сметка често ја надминува онаа за инвертер системи.
Пелетите нудат поголема удобност поради автоматизираното работење на печките, но нивната цена во последните години значително варира. За една грејна сезона, на просечно домаќинство му се потребни од два до четири тони, што го прави овој енергенс поскап од инвертер климите, но сè уште поевтин од класичното електрично греење.
Според просечните пресметки, месечните трошоци за греење изгледаат вака: инвертер клима уредите чинат од 2.500 до 4.500 денари, централното парно од 3.500 до 5.000 денари, огревното дрво од 4.000 до 6.000 денари, пелетите од 5.000 до 7.500 денари, додека електричните панели и греалки лесно можат да надминат 10.000 денари месечно.
Највисоки сметки, според експертите, имаат домаќинствата што користат обични електрични тела, каде соодносот меѓу потрошената и добиената енергија е еден на еден. За долгорочна заштеда се препорачува инвестирање во инвертер системи, како и подобрување на термичката изолација, со што сметките за греење може да се намалат и до 20 проценти.
