Во Општина Струга е во тек работната фаза од проектот за изградба на собирната улица „Туристичка“, која ќе ја поврзе крстосницата со улица ЈНА со населбата Езерски Лозја, објави премиерот Христијан Мицковски на официјалниот владин портал за капитални проекти.
Станува збор за еден од клучните инфраструктурни зафати за подобрување на урбаната поврзаност и сообраќајниот проток во градот, со кој значително ќе се олесни пристапот до туристичките и станбените зони, како и секојдневното движење на граѓаните.
Проектот опфаќа изградба на современа улица со должина од 1,5 километри и ширина од 24 метри, со целосна коловозна конструкција, сообраќајни ленти, пешачки површини и комплетна комунална инфраструктура, прилагодена на потребите на урбаниот развој и зголемениот сообраќај.
Во моментов се изведуваат градежни активности за подготовка на трасата, изградба на коловозната конструкција и оформување на основната сообраќајна инфраструктура, со што се поставуваат темелите за функционална, безбедна и долгорочно одржлива сообраќајница.
Вкупната инвестиција изнесува 135.850.000 денари и е обезбедена од Владата преку Министерството за транспорт, како дел од стратегијата за унапредување на локалната и регионалната инфраструктура.
„Проекти за трајна промена – темели за сигурна иднина“, порача премиерот Мицковски, нагласувајќи дека ваквите инвестиции се клучни за развојот на општините, подобар квалитет на живот и рамномерен регионален развој.
