Големата полициска акција што вечерва се одвиваше во скопското село Батинци доби појаснување – полицијата трага по лице осомничено за убиство, кое е барано по потерница.
Како што неофицијално дознава Булевар, во фокусот на акцијата е Муса Џавит, кој пред околу шест месеци, според истражните информации, усмрти војник на Армијата на Република Македонија во скопското село, по што избега и се крие од органите на прогонот.
Во текот на денот, во Батинци беа распоредени специјални полициски единици, повеќе патролни возила и истражни тимови, а видеоснимките што кружат на социјалните мрежи покажуваат масовно присуство на полицијата и блокади на повеќе улици.
Од Министерството за внатрешни работи засега официјално не потврдуваат детали, но акцијата се води како дел од потрагата по осомничениот, кој се смета за опасен и се бара со меѓународна потерница.
Полицијата апелира до граѓаните доколку имаат информации за движењето или престојот на лицето, веднаш да ги пријават кај надлежните служби, без да се обидуваат сами да стапат во контакт со него.
Акцијата во Батинци ја вознемири јавноста поради обемот и силното полициско присуство, а надлежните најавуваат дека истрагата продолжува и дека во наредните часови се очекуваат дополнителни информации за исходот од потрагата.
