Министерката за финансии Гордана Димитриеска Кочоска оствари средба со директорката на Канцеларијата на Светска банка во земјава, Карол Межеван, на која беа разгледани приоритетите за поддршка на клучните реформи преку Рамката за партнерство 2024–2028.
Како што соопшти министерката, фокусот на соработката е насочен кон подобрување на инвестициската клима, поддршка на приватниот сектор и отворање нови работни места, унапредување на јавните услуги и човечкиот капитал, како и кон климатска адаптација и зајакнување на управувањето со јавните финансии.
Димитриеска Кочоска истакна дека со поддршка од Светска банка, преку рамка вредна 695 милиони долари, продолжува спроведувањето на реформи насочени кон одржлив економски раст, зголемена конкурентност и обезбедување стабилни и отпорни јавни финансии, при што се води сметка и за фискалната консолидација.
