Грчката полиција утринава спроведе голема истражна акција низ целата земја, насочена кон разоткривање организирана криминална група која нелегално крадела гориво од граѓаните. Акцијата опфати над 30 истовремени претреси на бензински станици, претпријатија и приватни домови, а досега се приведени десет лица.
Истражната акција, координирана од Дирекцијата за борба против организиран криминал, се одвива во различни региони, вклучувајќи ја областа Атика, поширокиот регион на Атина, Солун, Тесалија, како и во централна, северна и североисточна Грција.
Според полицијата, членовите на организацијата користеле специјален нелегален софтвер на бензинските пумпи за да точат помала количина гориво од прикажаната, измамувајќи ги купувачите. Слични акции беа спроведени и минатата година, кога во март беа уапсени над 55 лица, а софтверот беше откриен на повеќе од 50 бензински пумпи ширум земјата. Два месеци подоцна, пет бензински станици во Солун и Атина беа затворени.
Грчката полиција продолжува со истрагата, со цел да ги открие сите инволвирани и да спречи повторување на вакви измами кон граѓаните.
