На годишната прес-конференција во Москва, рускиот министер за надворешни работи, Сергеј Лавров, го отвори прашањето за иднината на Гренланд, предизвикувајќи внимание во меѓународните медиуми. Според него, островот „не е природен дел од скандинавското кралство“, алудирајќи на историските и колонијалните импликации на статусот на Гренланд како автономна територија на Данска.
Лавров истакна дека проблемите поврзани со поранешните колонии денес стануваат се поизразени и дека Москва внимателно ја следи геополитичката динамика околу овој северен остров. „Ние немаме никакви планови да се мешаме или да ја преземеме контролата над Гренланд“, нагласи тој, реагирајќи на изјави на американскиот претседател Доналд Трамп.
Рускиот дипломат посочи дека одлуките околу Гренланд би требало да се носат во рамките на НАТО, нагласувајќи дека алијансата има капацитет и одговорност да се справи со ваквите чувствителни прашања. Иако Москва останува надвор од конкретните планови за островот, според Лавров, внимателното следење на ситуацијата е неизбежно поради стратешката важност на регионот.
