Грција од утрово е зафатена од сурово невреме, кое донесе интензивни врнежи од дожд, снег дури и во ниските предели, громови и силен ветер. Во повеќе региони беа затворени училишта, граѓаните добија предупредувачки пораки, а на атинските пристаништа е воведена забрана за пловидба, јави дописничката на МИА од Атина.
Уште вчера, поради прогнозата за екстремни временски услови, се одржаа состаноци во Министерството за климатски кризи и цивилна заштита. Како резултат, за региони како Атика, Пелопонез, Тесалија, како и централна и северозападна Грција е воведен „Red Code“ – црвено предупредување, што значи целосна мобилизација на сите институции за справување со кризната ситуација.
Противпожарната служба, полицијата, крајбрежната служба и армијата се ставени во зголемена готовност, со особено внимание на поширокиот регион на Атина. Од бројот 112 за итни случаи беа испратени предупредувачки пораки до пет региони, а утрово и сите жители на Атика добија исти инструкции: да ги ограничат движењата на апсолутно неопходните и да ги следат упатствата на надлежните органи.
„Поради интензивни временски појави што се очекуваат од пладне до доцна вечерта, ограничете ги движењата на најнеопходното. Слушајте ги надлежните органи“, стои во пораката од 112.
Силниот ветер ги закотви бродовите и траектите на атинските пристаништа, додека основните и средните училишта, како и градинките, во повеќе делови на земјата денеска се затворени и наставата се одвива онлајн. Поради заштита на учениците и наставниот кадар, префектот на Атика, Никос Хардаљас, нареди превентивно затворање на сите државни и приватни училишта во регионот.
„Знаејќи ги слабостите на старите инфраструктури, мораме да бидеме чекор пред опасноста. Одговорноста кон децата не трпи ризик“, нагласи Хардаљас.
Исто така, вработените во јавниот и приватниот сектор се советувани да работат од дома ако пристигнувањето на работното место не е безбедно, додека за оние чии активности се на отворено е воведен прекин на работа.
Националната опсерваторија во Атина и порталот „Метео“ ја класифицираат денешната прогноза како Категорија 5 – екстремна. Директорот на одделот за истражување, Константинос Лагувардос, предупреди: „Очекуваме големо и загрижувачко количество дожд за многу кратко време – до 50–60 милиметри за само шест часа.“
