Патната мрежа низ државата утринава се соочува со отежнати услови за сообраќај поради влажни коловози, а на дел од планинските превои е воведена забрана за движење на тешки товарни возила, информира Авто-Мото Сојузот на Македонија.
Камионскиот сообраќај е целосно стопиран на превоите Плетвар, Ѓавато, Пресека и на правецот Маврово–Дебар–Струга, како и на граничниот премин Ќафасан. Во останатиот дел од државата, надвор од урбаните средини, сообраќајот се одвива со умерен интензитет, без поголеми застои на граничните премини од македонска страна.
Од АМСМ потсетуваат дека законската обврска за задолжително поседување зимска опрема во возилата останува на сила до 15 март 2026 година, независно од тоа дали моментално има снег или мраз на коловозите.
Надлежните служби упатуваат апел до возачите за зголемена претпазливост, особено на патиштата што минуваат низ клисури, речни долини и котлини, каде што постои зголемен ризик од одрони. Како критични се издвојуваат делниците Катланово–Велес, Маврово–Дебар–Струга, Виница–Берово и Кочани–Делчево.
Во меѓувреме, патниот правец Охрид–Ресен преку Националниот парк Галичица и понатаму останува затворен за сите видови возила и нема да биде пуштен во сообраќај пред 31 март 2026 година.
Дополнително, на повеќе локации низ земјава е воведен времен изменет режим на сообраќај поради градежни зафати. Промени има на Коридор 10, на делницата Прилеп–Битола, на скопската обиколница кај Волково и Кондово, на експресниот пат Крива Паланка–Страцин, како и на други регионални и магистрални патишта. Сообраќајот таму се регулира со привремена сигнализација, знаменца или семафори.
Надлежните апелираат возачите да ја прилагодат брзината, да ги почитуваат сообраќајните знаци и навремено да се информираат за состојбата на патиштата пред да тргнат на пат.
