Министерот за транспорт и вицепремиер Александар Николоски предупредува на сериозна економска криза, откако новите правила за влез во шенген-зоната за професионални возачи значително го загрозуваат транспортниот сектор. Според него, една компанија веќе проценува загуби од 1,5 милиони евра неделно поради ограничувањата во транспортот на своите производи.
„Целата македонска економија и регионалниот извоз се доведени на работ на колапс. Овие мерки се сериозна закана за компании кои работат во ТИРЗ, но и за домашни извозно ориентирани фирми. Ако транспортот поскапи за 3 до 5%, производите стануваат неконкурентни на европскиот пазар,“ истакна Николоски во интервју за Радио Лидер.
Тој објасни дека проблемот не е само македонски, туку регионален: „Од понеделник започнува протест кој ќе трае седум дена на граничните премини кон шенген-зоната, на кој ќе учествуваат превозници од Македонија, Косово, Србија, Црна Гора и БиХ. Станува збор за огромен економски проблем кој директно ја погодува извозно ориентираната економија на целиот Балкан.“
Николоски нагласи дека и покрај континуираните преговори со ЕУ, одговорот останува нејасен и неодговорен. „Во декември имав жестоки разговори директно во Брисел, но за жал не најдов разбирање. Овие радикални мерки се единствениот начин да се привлече внимание на проблемот,“ додаде министерот.
Тој потенцира дека електронската евиденција за професионалните возачи во ЕУ го намалува времето на работа за половина, што го прави транспортниот бизнис неисплатлив. Со зголемување на трошоците за превоз, македонските компании ризикуваат да изгубат конкурентност, а дел од нив дури и да ја напуштат земјата.
