Повеќе од 100 лица се уапсени во Косово поради сомнежи за сериозни злоупотреби за време на парламентарните избори одржани на 28 декември, соопшти обвинителот од Призрен, Петрит Кријезиу. Според него, станува збор за организиран обид за поткопување на изборните резултати и волјата на граѓаните.
Обвинителството информира дека 109 лица се приведени поради фалсификување изборни резултати, вршење притисоци и заплашување на гласачи, како и поради активна и пасивна корупција. Постојат сомнежи дека биле манипулирани повеќе од 68.000 гласачки ливчиња.
Истрагата започнала во средината на јануари, а засега не е потврдено дали од наводната измама имала корист конкретна политичка партија. Според прелиминарните резултати, движењето Самоопределување, предводено од досегашниот премиер Албин Курти, освоило над 51 отсто од гласовите.
По утврдување на „висок степен на неточности“ при делумното пребројување, Државната изборна комисија нареди целосно повторно пребројување на гласачките ливчиња на сите избирачки места, соопшти претседателот на Комисијата, Крешник Радониќи. По оваа одлука, обвинителката Лаура Пула отвори истрага за можни кривични дела поврзани со изборниот процес.
Новото пребројување и тековната истрага дополнително го одложуваат формирањето на парламентот и владата, по избори што беа одржани по повеќемесечна политичка блокада. По гласањето, високата претставничка на ЕУ за надворешна политика, Каја Калас, порача дека Брисел очекува брзо формирање на нова влада со цел надминување на институционалниот застој.
