Германија најави нова програма за поттикнување на електрични возила со вкупна вредност од 3 милијарди евра, со цел да ја оживее продажбата која нагло опадна по укинувањето на субвенциите кон крајот на 2023 година.
Субвенциите ќе изнесуваат од 1.500 до 6.000 евра, во зависност од цената на возилото, приходите на домаќинството и бројот на членови во семејството. Буџетот е доволен за поддршка на околу 800.000 возила.
За разлика од многу европски земји, Германија нема да прави разлика меѓу домашните и странските производители, па субвенциите ќе бидат достапни и за кинески брендови. Министерот за заштита на животната средина, Карстен Шнајдер, изјави дека германските производители остануваат доволно конкурентни и дека нема ризик од преплавување на пазарот со кинески возила.
Програмата ќе важи до 2029 година, а апликациите ќе можат да се поднесуваат ретроактивно од 1 јануари 2026 година. Онлајн-порталот за пријавување се очекува да биде достапен во мај, додека конечните услови ќе бидат објавени подоцна во текот на годината.
Најголема корист ќе имаат домаќинствата со ниски и средни приходи. Покрај субвенциите, продолжуваат и даночните олеснувања за електрични возила до 2035 година, што ќе резултира со околу 600 милиони евра помалку приходи за државата.
Со овие мерки, новата германска влада се залага за постепен и флексибилен премин кон електромобилност, додека дебатата за забраната на моторите со внатрешно согорување на ниво на ЕУ сè уште трае.
