Европа не може самостојно да се заштити без американска воена поддршка, предупреди генералниот секретар на НАТО, Марк Руте, во својот настап пред Европскиот парламент. Според него, за да постигне автономна одбрана, Европа би морала да ги удвои трошоците за војска, што значи трошење на ниво од најмалку 10% од БДП – двојно повеќе од сегашните планови на повеќето земји.
„Ако мислите дека Европа може сама да се брани без САД, тоа е само сон. Америка и Европа се потребни едни на други“, изјави Руте, истакнувајќи дека без американскиот нуклеарен чадор, континентот ќе остане без краен гарант на својата безбедност.
Неговите коментари доаѓаат во време на зголемени тензии меѓу сојузниците на НАТО, откако поранешниот претседател Доналд Трамп закани дека ќе го „заземе“ Гренланд и најави нови царини за осум европски земји. Иако подоцна се откажа од царинските мерки, деталите за наводниот договор за Гренланд во кој посредувал Руте не беа објавени.
На јулишниот самит на НАТО, речиси сите членки се согласија да ги зголемат трошоците за одбрана до 5% од БДП до 2035 година, освен Шпанија. Руте, сепак, предупреди дека ова е недоволно за автономна одбрана. „Ако навистина сакате да одите сами, ќе треба 10%. Мора да изградите сопствен нуклеарен капацитет, а тоа чини милијарди евра. Без Америка, слободата на Европа е загрозена“, потенцираше тој.
Генералниот секретар на НАТО го отфрли и концептот за создавање посебна европска армија, предупредувајќи дека тоа би ги ослабило постоечките армии. „Владимир Путин би ја сакал оваа идеја, затоа што би ги растегнало и ослабило европските војски“, додаде Руте.
