Македонија и понатаму го задржува приматот на земја со најевтини горива во регионот, и покрај растот на цените на светските пазари предизвикан од геополитичките тензии на Блискиот Исток.
Според најновите податоци, цената на дизелот во Македонија изнесува 1,59 евра за литар, што е најниско ниво во југоисточна Европа. За разлика од тоа, најскап дизел се продава во Албанија, каде што достигнува 2,33 евра за литар. Ваквата ценовна разлика веќе предизвикува зголемен интерес кај албанските граѓани од пограничните региони, кои масовно доаѓаат во Струга за да наполнат гориво, комбинирајќи го тоа со шопинг.
По Македонија, најниски цени на дизел имаат Бугарија со 1,61 евра и Унгарија со 1,62 евра за литар. Потоа следуваат Црна Гора со 1,78 евра, Словенија со 1,81, Србија со 1,82, Босна и Херцеговина со 1,84, Хрватска со 1,85 и Романија со 2,05 евра за литар.
Слична е ситуацијата и со бензинот. Во Македонија литар бензин се продава за 1,35 евра, што е најниска цена во регионот, додека највисока цена повторно има во Албанија – 1,88 евра за литар. Во останатите земји цените се движат од 1,44 евра во Бугарија, 1,45 во Босна и Херцеговина, 1,54 во Унгарија, 1,59 во Црна Гора, 1,61 во Србија, 1,62 во Словенија, 1,66 во Хрватска и 1,83 евра во Романија.
Разликите во цените ја прават Македонија атрактивна дестинација за полнење гориво за граѓаните од соседството, особено во услови на зголемена нестабилност на глобалните енергетски пазари.
