Министерката за енергетика, рударство и минерални суровини Сања Божиновска најави поддршка и покровителство од страна на Министерството за Националниот натпревар за најдобар бизнис концепт за зелени иновации наменет за средношколци.
Божиновска ја најави иницијативата денеска, од настанот „Европската ноќ на истражувачите“ во МАНУ, во Куќата на науката.
На овогодинешниот натпревар учествуваат 42 средношколски тимови, кои ги претставуваат своите идеи и решенија во областа на зелените иновации.
„Инвестицијата во младите е инвестиција во зелената иднина“, порача Божиновска, посочувајќи дека младите преку своите идеи покажуваат знаење, креативност и храброст да создаваат нови решенија.
Според неа, задачата на институциите е да им обезбедат простор и поддршка на младите, со цел нивните иновативни идеи да добијат можност да се развијат и да станат реалност.
„Истражувајте. Експериментирајте. Создавајте. Младите не се само иднината, тие се креатори на промените што ги правиме денес“, порача министерката.
…
