Светската здравствена организација (СЗО) предупредува дека премалото оданочување на засладените и алкохолните пијалаци носи сериозни последици по јавното здравје. Според експертите, ниските цени на овие производи го олеснуваат прекумерното консумирање, што води до зголемени стапки на дебелина, дијабетес и други хронични заболувања. Најранливи се децата и адолесцентите, кои се особено изложени на ризик.
СЗО апелира владите да воведат или да ја зголемат даночната стапка за овие пијалаци. Потегот би ги направил производите поскапи и би го намалил нивното консумирање, а истовремено би обезбедил дополнителни средства за здравствениот систем.
Според последните податоци на организацијата, 116 земји веќе имаат даноци на безалкохолни пијалаци и други засладени напитоци, но голем број други продукти со висок шеќерен удел, како стопроцентните овошни сокови, засладените млечни пијалаци и готовите кафе и чај напитоци, сè уште се ослободени од даноци.
„Здравствените даноци се една од најмоќните алатки за промовирање на здравите навики и спречување болести,“ истакна генералниот директор на СЗО, Тедрос Аданом Гебрејесус.
Кога станува збор за алкохолот, ситуацијата е различна. Жестоките пијалаци како ракија, коњак, вотка и виски веќе се оданочуваат, додека пивото има посебен данок. Меѓутоа, најмалку 25 земји во Европа, вклучувајќи ја и Германија, сè уште немаат воведено акциза за виното.
– „Консумацијата на алкохол носи сериозни ризици: болести, повреди и насилство. Додека индустријата остварува профит, здравствените последици ги сноси јавноста, а економските трошоци – целото општество,“ предупредува Етиен Круг, директор во СЗО.
