Доналд Трамп изјави дека се надева на постигнување договор со Иран, неколку часа откако врховниот лидер Али Хамнеи предупреди дека евентуален американски напад би можел да предизвика „регионална војна“. Изјавата американскиот претседател ја даде од Флорида, нагласувајќи дека Вашингтон е подготвен да продолжи со притисокот врз Техеран доколку нема договор.
„Се надевам дека ќе постигнеме договор. Ако не, ќе видиме дали врховниот лидер бил во право или не“, рече Трамп, алудирајќи на предупредувањата од иранска страна. Тој додаде дека САД го засилиле поморското присуство на Блискиот Исток, истакнувајќи дека таму се распоредени „најголемите и најмоќните бродови во светот“.
Администрацијата на Трамп со денови испраќа мешани сигнали кон Иран, комбинирајќи закани за интервенција со повици за нуклеарен договор и прекин на насилството врз демонстрантите. Иранските власти, пак, порачуваат дека се отворени за „фер“ разговори, но без услови што би ги ограничиле нивните одбранбени капацитети.
Во меѓувреме, протестите во Иран, кои започнаа кон крајот на декември поради економските тешкотии и прераснаа во најсериозен политички предизвик за Исламската Република од 1979 година наваму, се смирија по силната репресија. Според официјалните податоци, во немирите загинале 3.117 лица, додека американската организација за човекови права ХРАНА тврди дека потврдила 6.713 смртни случаи, бројки што Ројтерс не можеше независно да ги потврди.
Хамнеи протестите ги опиша како „пуч“, обвинувајќи дека целта на востанието била напад врз државните институции, јавија иранските државни медиуми.
