Во деловен објект на улицата „Бутелска“ се откри тешка кражба на електрична енергија, информираат од Електродистрибуција. Според нив, објектот, кој претходно функционирал како млин, бил незаконски приклучен на трафостаница и користен за напојување на системи за копање криптовалути, поточно биткоин.
Тимот за откривање на неовластено користење на струја, поради сомневање за измама, побарал асистенција од Министерството за внатрешни работи и ангажирал овластено вешто лице. Пребарувањето во објектот потврдило дека незаконското приклучување било извршено преку три нисконапонски кабли директно во трафостаницата, сопственост на Електродистрибуција.
По констатирањето на нарушувањето, составен е записник за неовластено користење на електрична енергија и изготвен е наод и мислење од вешто лице. За случајот е поднесена пријава до МВР според член 235-а од Кривичниот законик, а за нанесената штета изготвена е фактура од 16 милиони денари.
Од компанијата нагласуваат дека оваа акција е дел од редовните контроли и дека нема да толерираат никакви обиди за незаконско присвојување на електрична енергија.
