Македонија денеска се сеќава на една од своите најсилни историски фигури – се одбележуваат 154 години од раѓањето на Гоце Делчев, револуционерот што дал визија за слободата како цивилизациска и културна битка, а не само како оружен судир.
Во Скопје, во дворот на црквата „Свети Спас“, каде што почиваат неговите посмртни останки, ќе се одржи централното државно чествување. Пред саркофагот на Делчев ќе се поклони државниот и политичкиот врв – премиерот Христијан Мицкоски, собраниска делегација предводена од потпретседателката Весна Бендевска, пратениците Сергеј Попов, Даниела Белимова и Сања Лукаревска, како и претставници на Град Скопје, институции, политички партии и граѓански организации.
Роден на 4 февруари 1872 година во Кукуш, во домот на Султана и Никола Делчеви, Гоце уште рано го избрал патот на знаењето и отпорот. Образованието го стекнувал во Солунската гимназија и на Воената академија во Софија, но вистинската животна мисија ја нашол меѓу народот – како учител во Штип и како еден од клучните организатори на Тајната македонско-одринска револуционерна организација.
Како член на Централниот комитет на ТМОРО, Делчев ја градел организациската мрежа што ја држела револуцијата жива: комитети, бази, комитски чети и врска со населението. Заради таа неуморна дејност, меѓу соборците бил познат како „апостол на револуцијата“, а за противниците – најопасниот непријател.
Хуманист по убедување и борец по нужност, Делчев ја минал Македонија надолж и попреку, верувајќи дека слободата мора да се избори со свесен, организиран и достоинствен народ. Учествувал на Солунскиот конгрес на ВМРО во 1896 година, а подоцна, до 1901, бил задграничен претставник на Организацијата во Софија.
Неговата револуционерна патека била прекината на 4 мај 1903 година, кога бил убиен од турска војска во селото Баница, на пат кон Сер. Но идејата што ја носел – за слободна Македонија и за свет во кој народите се натпреваруваат со култура, а не со сила – останала да живее.
Од 1946 година, саркофагот со посмртните останки на Гоце Делчев се наоѓа во дворот на „Свети Спас“ во Скопје – место на тивка почит, но и на гласно историско сеќавање.
