Денес во Скопје се одржува трилатерална конференција која има за цел да ги зајакне правата и учеството на лицата со попреченост во политичкото и економското живеење на регионот. На настанот, финансиран од Сојузното министерство за економска соработка и развој на Германија, се собираат претставници на релевантните министерства, организации на лица со попреченост, експерти и претставници на приватниот сектор од Македонија, Албанија и Косово.
Конференцијата се фокусира на повеќе клучни цели: поттикнување на активно учество на лицата со попреченост во креирањето на политики и институционални реформи, усогласување на националното законодавство со Конвенцијата на ООН за правата на лицата со попреченост, како и зајакнување на регионалната соработка и мрежите за размена на знаење и добри практики.
Организаторите истакнуваат дека овој собир не е само форум за дискусија, туку и платформа за градење партнерства и конкретни решенија кои ќе го подобрат животот на лицата со попреченост низ целиот регион.
