Македонските мали, микро и средни компании наскоро ќе добијат уникатна можност да инвестираат во зелена и одржлива иднина. Агенцијата за иновации, научно-технолошки развој и претприемништво (ИНОВА) најави грантова шема со вредност од 22 милиони евра, дел од проект од 25 милиони евра кој ќе се спроведува во периодот 2026–2030 година.
Грантовите ќе се движат од 5.000 до 300.000 евра, а компаниите ќе треба да обезбедат сопствено учество од 20 до 50 проценти, во зависност од избраниот инструмент. Целта е да се поддржат најмалку 300 компании од различни сектори, особено производствени, кои се спремни да го направат пресвртот кон еколошки иновативни решенија.
Првите јавни повици ќе бидат објавени во средината на 2026 година, а за да информацијата стигне до секоја компанија, ИНОВА ќе организира инфо-караван во соработка со општини, стопански комори и регионални и секторски здруженија. Компаниите ќе можат да аплицираат за техничка и советодавна поддршка, финансиска помош за набавка на опрема и технологии, стандардизација и развој на нови производи.
„Ова е почеток на вистинска трансформација на македонската економија. ИНОВА нема да биде само администрација, туку вистински партнер на бизнисот“, порача директорката Даниела Димовска на официјалниот почеток на проектот „Грантова шема за поддршка на претпријатијата за зелено работење“.
Таа потенцираше дека фокусот е на компании со потенцијал за реална зелена трансформација, кои ќе можат да ја намалат потрошувачката на ресурси, да го зголемат користењето на обновливи извори на енергија и да го намалат отпадот. – „Зелената транзиција не е трошок, туку инвестиција во иднината. Целта ни е да создадеме нова генерација зелени лидери кои ќе бидат чекор пред европските стандарди“, додаде Димовска.
Проектот предвидува и создавање на „хаб на знаења“ – платформа за споделување на искуства и најдобри практики, со очекуван ефект на поефикасни компании, пониски трошоци, нови зелени работни места и економија што расте без да ја загрозува иднината на следните генерации.
Од вкупната вредност на проектот од 25 милиони евра, 18 милиони се обезбедени како поддршка од Европската унија, а седум милиони се национални буџетски средства. Како што истакнуваат од ИНОВА, оваа иницијатива директно придонесува за европскиот „Грин Дил“ и Зелената агенда на Западен Балкан, забрзувајќи ја примената на зелени практики и подигајќи ја свеста за економските придобивки од одржливи инвестиции.
„Сега е време за зелена акција. Македонија знае, може и мора да оди напред – паметно, одржливо и храбро“, заклучи Димовска.
