Apple направи голем исчекор во развојот на своето интегрирано развојно опкружување (IDE), претставувајќи ја новата верзија Xcode 26.3, која носи длабока интеграција на вештачка интелигенција. Со ова, задачите кои порано бараа часови внимателно кодирање, тестирање и исправка на грешки, сега можат да се автоматизираат речиси во целост, со минимален човечки надзор.
Новата верзија го воведува директното користење на два моќни AI агенти – Claude Agent од Anthropic и Codex од OpenAI. Досегашните ограничени интеграции со ChatGPT и Claude беа само први чекори, но сега агентите добиваат нативен пристап до функциите на Xcode, што овозможува нивно целосно вклучување во процесот на развој на апликации за Apple платформите.
Со ова, AI може не само да пишува и менува код, туку и да гради проекти, да извршува тестови, да открива грешки и да пребарува најнови документации. Девелоперите, како што посочува Apple, ќе можат да се фокусираат повеќе на иновации, додека рутинските задачи ќе бидат автоматизирани. „Агентското кодирање ја зајакнува продуктивноста и креативноста, овозможувајќи им на девелоперите да се фокусираат на иновации“, вели Сузан Прескот, потпретседателка за односи со девелоперите.
Покрај тоа, Apple работела со партнерски компании за оптимизација на искористеноста на токените, обезбедувајќи ефикасни перформанси со пониски трошоци. Новите AI можности се достапни и преку индустрискиот стандард MCP, а крајните корисници ќе можат лесно да изберат кој модел на вештачка интелигенција ќе го користат преку едноставно паѓачко мени.
