Владата останува целосно посветена на спроведувањето на Реформската агенда, а во текот на оваа година нема да има избори, изјави премиерот Христијан Мицкоски на брифинг во Владата посветен на напредокот во реформските процеси.
На средбата, на која присуствуваа членови на Владата, амбасадори на земјите членки на Европската Унија и претставници на меѓународната заедница, беше направена анализа на досега реализираните активности и беа презентирани идните приоритети во клучните области.
Мицкоски посочи дека дел од планираните реформи веќе се спроведуваат, додека одредени чекори, поради објективни околности, нема да можат да се реализираат во предвидениот рок, за што, како што рече, навремено се информирани меѓународните партнери.
Тој потсети дека Владата по изборот пред околу 20 месеци усвоила индикативна листа на чекори кои требало да се реализираат во првата година и половина, во тесна соработка со Европската Унија. Според него, процесот на одобрување и усвојување траел до почетокот на 2025 година, кога започнала и нивната практична реализација.
Премиерот нагласи дека динамиката била прекината со распишувањето на локалните избори, поради што, согласно домашното законодавство, Парламентот и дел од институциите работеле со намален капацитет, што резултирало со неколкумесечна пауза. По завршувањето на изборите, од ноември, Владата повторно интензивно се посветила на реализација на реформските чекори кои се во нејзина надлежност.
„Ќе ги исполниме сите обврски што можеме да ги реализираме, а за останатите ќе понудиме аргументирано објаснување“, изјави Мицкоски, додавајќи дека Владата е подготвена за отворен и искрен дијалог со меѓународната заедница, особено со Европската Унија.
Тој потенцираше дека годинава нема да има избори, бидејќи приоритет на Владата се реформите и, како што рече, воспоставување ред во државата. Како клучни приоритети ги наведе проектот „Безбеден град“, борбата против криминалот и корупцијата, како и нови законски решенија поврзани со заштитата на здравјето на граѓаните, вклучително и ново законско решение за пушењето.
Премиерот оцени дека Владата има амбициозна реформска агенда за оваа година со цел целосно исполнување на обврските, по што, како што рече, одлуката за понатамошниот тек ќе биде во рацете на земјите членки на Европската Унија.
Мицкоски најави дека следните брифинзи со амбасадорите ќе се одржат во март и јуни, а потоа најмалку еднаш на секои три месеци, со цел редовно информирање за напредокот во спроведувањето на Реформската агенда.
