Судскиот процес за трагичниот пожар во дискотеката „Пулс“ во Кочани, каде што на 16 март 2025 година животот го загубија 63 лица, а повеќе од 200 беа повредени, денеска продолжи во судницата во Идризово. Процесот, предводен од судијката Дијана Груевска Илиевски, влезе во доказната фаза, со сослушување на сведоци предложени од Обвинителството. За денешното рочиште се најавени пет нови искази од лица што биле присутни во клубот во моментот на катастрофата.
Минатото рочиште сведоците ги опишаа моментите на хаос и паника кога огнот и чадот ја зафатија преполната дискотека, а многумина од нив детално зборуваа за траумите и последиците што ги чувствуваат и денес.
Адвокатот Петре Шилегов уште пред рочиштето изрази сомнеж за начинот на водење на постапката, повикувајќи се на брифингот на ОЈО ГОКК за запирање на постапката против службени лица. Тој нагласи дека против дел од обвинетите можат да бидат повлечени обвиненијата, истовремено посочувајќи на економската и правната неодржливост на судењето, кое, според него, државата ја чини околу 150.000 евра.
Обвинителот Борче Јанев, пак, истакна дека Обвинителството не располага со конечните одлуки од ОЈО ГОКК и дека обвинителниот акт се однесува на другите обвинети, нагласувајќи дека судењето е суштинско за утврдување на лична и институционална одговорност. „Не е важно само кој го запалил огнот, туку и кој имал можност да го спречи. Трагедијата не е резултат само на пиротехника, туку на системски пропусти и институционален молк“, рече Јанев, додавајќи дека правдата се бара не како одмазда, туку како одговор на занемарените законски должности.
Одбраната на обвинетите, вклучувајќи го и сопственикот на дискотеката Дејан Јованов и неговиот син Михаил, ја оспори основата на обвинението, тврдејќи дека трагедијата е резултат на институционални пропусти, а не индивидуална вина. Јованов, кој помина девет месеци во притвор, во воведното излагање изјави дека како родител никогаш не би дозволил опасни услови во клубот. Михаил Јованов преку адвокатот посочи дека против него нема конкретни докази и дека е обвинет единствено поради семејната врска.
Пожарот во „Пулс“ избувна за време на настапот на групата „ДНК“. Објектот беше преполн над дозволениот капацитет, внатре имаше и малолетници, а пиротехнички средства беа активирани без дозвола. Клубот со години работел незаконски, без минимални технички услови, со нелегални реконструкции и без систем за противпожарна заштита, што го претвори во „смртоносна стапица“.
