Украина е решена да ја заврши војната со Русија, но само под услов да се зачува нејзината независност, истакна претседателот Володимир Зеленски во ексклузивно интервју за француската телевизија Франс 2.
„Навистина верувам дека во рок од една година можеме да постигнеме мир. Тоа е мојот приоритет, како и приоритет на целиот мој тим. Преговараме, работиме на тоа, но нема да направиме компромис што би го загрозил суверенитетот на Украина“, нагласи Зеленски.
Украинскиот претседател посочи дека Русија продолжува да ја напаѓа цивилната инфраструктура и да користи студено оружје, додека истовремено своите ултиматуми ги претставува како обид за компромис. „Колку повеќе цивили страдаат, толку е подалечна можноста за вистински договор“, рече тој.
Зеленски појасни дека дипломатскиот пат не значи капитулација. Рускиот предлог за повлекување на украинските сили од Донбас, како што рече, претставува „црвена линија“. Дури и замрзнување на фронтовската линија на сегашните позиции би било „огромна отстапка“ за Украина, но дијалогот останува отворен – секако, под услов да се зачува независноста на земјата.
Во врска со иницијативата на францускиот претседател Емануел Макрон за продолжување на преговорите со Владимир Путин, Зеленски е претпазлив: разговори се возможни, но само „под одредени услови“. „Притисокот врз Русија сè уште не е доволен. Путин моментално ги користи преговорите за да ја понижи Европа, а не за да најде мир“, додаде тој.
Исто така, Зеленски откри дека во четирите години од почетокот на конфликот, Украина изгубила околу 55.000 војници, додека многу ветерани сè уште се водат како исчезнати. Тоа е раст од повеќе од 9.000 жртви во споредба со бројката што ја објави пред една година за Ен-би-си – над 46.000 загинати.
